Policia e Kosovës ka zbatuar sot një plan operativ për përvjetorin e 25 të Masakrës së Reçakut për të garantuar sigurinë e të gjithëve, duke bërë kështu disa kufizime të pjesshme të rrugëve në zona të caktuara në qytetin e Shtimes dhe në fshatin Reçak.

Në njoftim thuhet se zbatimi planit operativ “Përvjetori i 25-të i Masakrës së Reçakut” ka kaluar pa asnjë incident dhe aksident, përcjell Arbresh.info.

“Stacioni i policisë në Shtime i mbështetur dhe i përkrahur nga policë të stacionit në Ferizaj, Kaçanik, policë të Njësisë së Komunikacionit Rrugor, policë të Sektorit Rajonal të Hetimeve dhe njësi tjera rajonale, nga ora 06:00 e mëngjesit, e deri në përfundim i ka marrë masat e nevojshme të sigurisë, që nga mbajtja e akademisë përkujtimore në Shtime dhe vizitat e planifikuara shtetërore, diplomatike dhe vizitat e qytetarëve në fshatin Reçak të Shtimes. Zbatimi i këtij plani në përkujtim të masakrës së Reçakut ka kaluar pa asnjë incident dhe aksident”, thuhet në njoftim.

Policia Rajonale e Ferizajt falënderon qytetarët që patën durim gjatë lëvizjes së orientuar nga policia, në drejtim të Kompleksit Memorial” Masakra e Reçakut ” në fshatin Reçak të Shtimes./Arbresh.info